- මහාචාර්ය සුමනසිරි ලියනගේ
නලින් මට මුලින්ම මුණ ගැසුනේ කවදා දැයි මට මතක නැත. ඒ 1970 මැතිවරණයට පසුව ය. වික්‍රමබාහු හමු වූයේ ද ඒ කාලයේදී ය. මා එවකට නැවති සිටියේ අරුණාචලම් ශාලාවේ ය. විද්‍යා පීඨ ගුරුවරු දිවා ආහාරය සදහා ආසන්නයේ පිහිටි අරුණාචලම් සහ ජයතිලක ශාලාවලට පැමිණියෝ ය. අප කෑම ගත්තේ ප්‍රධාන භෝජන ශාලාවට පිටුපස කුඩා කාමරයක දී ය. හයි ටේබලය තිබුනේ මේ දෙක අතර ය. දිනෙක අරුණාචලම් ශාලාවේ නවාතැන් ගෙන සිටි විද්‍යා අංශ තරුණ කථිකාචාර්යවරයෙකු සමග පුළුල් නලලක් ඇති, කමිසයේ උඩ බොත්තම විවර කරගත් කෙනෙක් පැමිණ සිටියහ. "මේ ඩොක්ටර් නලින්, නලින් ද සිල්වා මැත්ස් එකේ". පොදු හැදින්වීමක් කෙරින. "ඔයාලගෙ පක්ෂෙ කෙනෙක්" මා වෙනුවෙන් විශේෂ හැදින්වීමක් කෙරින.
එතැන් සිට අපි ආසන්න මිතුරන් මෙන්ම වසර දහයකට වඩා වැඩි කලක් දේශපාලන සගයන් ද වූහ. ඊට පසු අපි දෙදෙනම ජේම්ස් පීරිස් ශාලාව ට මාරු වීමු. 1971 ට ආසන්න මේ කාලයේ දී සමසමාජ අපට නිතර විවාදයනට පැටලෙන්ට වූයේ ජනතා විමුක්ති පෙරමුණ සමග ය. විවෘත විවාද තිබින. එයින් අමතක නොවන්නකි සංඝාරාමයේ තිබූ විවාදය. සමසමාජය වෙනුවෙන් සහභාගි වූයේ නලින් සහ මා ය. අපේ ආරක්ෂාවට ශිෂ්‍යයින් කිහිප දෙනෙක් පැමණ සිටියහ.
මේ කාලයේ දී තමයි මහනුවර ලෝකලය තුළ පක්ෂ ලයින් එකට එරෙහි ඉගුරු කල්ලියක් ගොඩ නැගුනේ. එහි ජනප්‍රිය නායකයා වූයේ පොල් වික්කා ය. න්‍යායයාත්මක නායකත්වය සැපයූයේ ලාල් විජේනායක ය. වික්‍රමබාහු, නලින් සහ මම ක්‍රියාකළේ ඒ කල්ලිය සමග ය. පසුව නව සමසමාජ පක්ෂයේ න්‍යෂ්ටිය වූයේ එය ය.
1970 ගණන් මැද නලින් සහ මම වසර දෙකක් පමණ ඕස්ට්‍රේලියාවේ ගත කෙරුවෙමු. නලින්, තමරා සහ ළහිරු සිටියේ මෙල්බර්න් වලය. රීටාත් මමත් සිටියේ සිඩ්නි නුවර ය. අපි එක් නිවාඩුවකට මෙල්බර්න් ගියෙමු. මේ වනවිට නසසප බිහිවී නොතිබුනද එය පක්ෂයක් ලෙස ක්‍රියා කළේ ය. පක්ෂයට මුද්‍රණාලයක් ගැන්මට අපි අරමුදලක් එකතු කළෙමු. ඊට ලොකුම දායකත්වය සැපයූවේ නලින් ය. 1977 දී පමණ අපි ලංකාවට පැමිණියෙමු. ඒ තමරාගේත් මගේත් අධ්‍යාපන කටයුතු මගදී නතර කරමිනි.
නලින් මේ සමයේ දී මහනුවර නසසප නායකයා ලෙස ක්‍රියා කළේ ය. 1970 ගණන් අග නව සමසමාජ මධ්‍යම කාරක සභාවේ වාම ප්‍රවණතාවයට නායකත්වය දුන්නේ නලින් ය. නලින්ගේ කංඩායම වාම විරුද්ධ පක්ෂය ලෙස හැදින්විම නිවැරදි ය. පක්ෂයේ වෘත්තිය සමිති නායකයන් සිටියේ නලින් සමග ය. මා හිතන විධියට 1980 වර්ජනයේ පරාජය සමගය, දෙවන නලින් බිහිවන්නේ. මා දකින මේ සමාන්තරත්වය තුළ වුවද එය හේතුව ලෙස දැක්වීමට අකමැත්තෙමි. තව ලිවිය හැකි දෑ බොහෝ ය.
නලින් වමෙන් ඉවතට ගමන් ගත්තේ එක්වර නොවේ. ඒ අතරතුර හේ අත් හදා බැලීම් කිහිපයක් කළ බව පමණක් මට කිව හැක.
මහාචාර්ය නලින් ද සිල්වා ගේ අභාවය ගැන පුවත දැඩි කණගාටුව ගෙන දුන් පුවතක්.
හොද මිතුරෙක්! තමරාට සහ පුතුන් දෙදෙනටත් දුවටත් මගේ සාතිශය සංවේගය!
